ജീവിതത്തെ യാത്രയോടുപമിക്കുക പതിവാണ്. യാത്രയില് കാഴ്ചകള് മാറി മാറി വരും. അത് പോലെയാണ് ബന്ധങ്ങളും. നാമറിയാതെ നമ്മിലെക്കെത്തി ചേരുന്ന ബന്ധങ്ങള്. ചേര്ക്കാന് മറക്കുന്ന പലതും നമ്മെ കൂട്ടി ചേര്ക്കുന്ന രക്ത ബന്ധങ്ങള്. വിധി രക്ത ബന്ധത്തില് കൂട്ടി ചേര്ക്കാന് മറക്കുന്ന പല ബന്ധങ്ങളും കര്മ്മ ബന്ധമായ് നമ്മിലേക്കെത്തി ചേരും. സ്നേഹമെന്നോ,സൌഹൃദമെന്നോ,പ്രണയമെന്നോ പേരിട്ടു നാം അതിന്നെ വിളിക്കും. എത്രയോ ഋതുക്കള് നമ്മെ തഴുകി അകന്നു പോകുന്നു. ഋതുക്കളുടെ മാറ്റത്തിനനുസരിച്ച് പല ബന്ധങ്ങളും മാറി വരുന്നു. വേനലില് കുളിര് മഴയായ് ആത്മാവിലെക്കെത്തിയ ബന്ധങ്ങള്,മഴയെ സ്നേഹിക്കാന് പ്രേരിപ്പിച്ച ബന്ധങ്ങള്,ശിശിരത്തില് കൊഴിഞ്ഞു പോകുന്ന പൂക്കള് പോലെ ഇല്ലാതായ് പോകുന്ന ബന്ധങ്ങള്..... അങ്ങനെ എത്രയെത്ര മാറ്റങ്ങള് നാമറിയാതെ നമ്മുടെ ജീവിതത്തില് ഉണ്ടാവുന്നു. ചില ബന്ധങ്ങളുടെ നില നില്പ്പിനു ഒരു ചിരിയോ ഒരു വാക്കോ മാത്രം മതി. മറ്റു ചിലവയുടെ അടിസ്ഥാനം എസ് എം എസുകളുടെ എന്നമാവം. അത് കുറയുന്തോറും ആ ബന്ധങ്ങള് നഷ്ടപെട്ടെക്കാം. ഒരു മരത്തിലെ എല്ലാ ഇലകളും കൊഴിഞ്ഞു പോയാലും വിട്ടു പോകാന് മടിക്കുന്ന ഒന്നോ രണ്ടോ ഇലകളും പൂക്കളും ഉണ്ടാവാറുണ്ട്. അത് പോലെ എല്ലാ കാലത്തും ജീവിക്കാന് പ്രതീക്ഷ തരുന്ന ചില ബന്ധങ്ങള് ഉണ്ടാവും. അവയ്ക്ക് പ്രത്യേകിച്ച് ഒരു പേര് നല്കാനോ നിര്വചിക്കാനോ കഴിയാറില്ല. ഒന്നോര്ത്താല് എല്ലാവരുടെയും ജീവിതത്തില് അത്തരം ബന്ധങ്ങള് പലകാലത്തും ഉണ്ടായിട്ടില്ലേ??? എത്ര കാലം പിന്നിട്ടാലും കൂടയില്ലെങ്കില് പോലും ഒരു പ്രതീക്ഷ പോലെ നമ്മിലെക്കെത്തി ചേരുന്ന മുഖങ്ങള്. എവിടേയോ നാമറിയാതെ നാം തന്നെ കൈ വിട്ടു കളഞ്ഞവ,അല്ലെങ്കില് നമ്മെ വിട്ടു പോയവ. എന്നോ ഒരിക്കല് നമ്മെ ചിരിക്കാന് പ്രേരിപ്പിച്ചവ,നമ്മുടെ കണ്ണീര് തുടച്ചു മാറ്റിയവ,ജീവിക്കാനുള്ള പ്രതീക്ഷയായ് നിലനിന്നവ..... സ്നേഹവും സൌഹൃദവും കൂടി ചേര്ന്ന് എന്റെ ജീവിതത്തിലെ പ്രതീക്ഷയായ ആ പേരറിയാത്ത ബന്ധങ്ങള്ക്കായ് ഈ വാക്കുകള് സമര്പ്പിക്കുന്നു. ഈ തിരക്കിട്ട ജീവിത നിമിഷങ്ങള് മാറ്റി വെച്ച് കുറച്ചു നേരം നിങ്ങളും ചിന്തിച്ചു നോക്കു പല മുഖങ്ങളും നിങ്ങളുടെ മനസിലേക്കെത്തും. ആ നിമിഷം നിങ്ങള്ക്ക് നല്കുന്നത് ചിലപ്പോള് ഓര്മകളുടെ ഒരു നനുത്ത പുഞ്ചിരിയാവാം,അല്ലെങ്കില് ചിലപ്പോള് നഷ്ടബോധത്തിന്റെ കണ്ണീരാവാം. എപ്പോഴെങ്കിലുമൊക്കെ ഇത്തരം നിമിഷങ്ങള് ഉണ്ടാവുന്നത് നല്ലതാണ്. അവ നേടിയതിന്റെയും,നഷ്ടപ്പെട്ടതിന്റെയും ഒക്കെ തിരിച്ചറിവിന്റെ നിമിഷങ്ങളാണ്. ഇനി,ഓര്ത്തു നോക്കു മറന്നു പോയ ആ മുഖങ്ങള്ക്കായ്,പേരറിയാത്ത ബന്ധങ്ങള്ക്കായ്..........
